قليل وين نكتب بالدّارجة. واليوم قلبي معبّي وحتّى لغة بخلاف لغة أمّي ما تنجّم تفرهدني...
لو كان ثمّ كلمة صدق فيها الشيخ مورو راهي كلمته: يلعن بو السياسة...
اليوم وآنا كيف كلّ مواطن تونسي نشوف في العجب نقول يلعن بو السياسة.
لأصحابي اللي قالولي آشبيك ما تعملش عمل سياسي مباشر وما تنتميش نقول لهم: يلعن بو السياسة بالطريقة اللي يعملو فيها البعض:
يلعن بو السياسة اللي تخلّي فيّ نشوف ناس نعرفهم يدورو من بقعة لبقعة ويعملو في حملة انتخابية للزّواولة والمزمّرين يوعدوا فيهم بخدمة وشهريّة وإلا بجنّات تجري من تحتها الأنهار وإلاّ بحور عين وهوما حاجتهم منهم بصوت...ينجّموا يكونوا ماهمش يكذبو عليهم آما آنا نعرف مليح اللي مشكلتهم موش مشاغل النّاس ولا حتى إمكانية حلّ مشاكل ها النّاس آما اللي يهمّهم نجاحهم في الانتخابات لتحقيق أهدافهم. اللي عندو عقدة نقص يحبّ ياخو منصب.اللي طامع في زوز صوردي.اللي يحبّ يظهّر روحه قدّام ناس حقروه وطفّاوه. اللي يحبّ يشبرش وينفع أصحابه ومعارفه واللي باش يلحّسوله ويقفّفوله في المستقبل بقدرة ربيّ.
يلعن بو السياسة كيف تخلّي ناس تسبّ في ناس وتفضح في أعراض ناس. بالكذب بالتلفيق. هاو فيديو من هوني مقصوص، هاو مقال مقطوع على سياقه، هاي تصويرة مركّبة. المهمّ على قدّ ما نظهّر الأخرين كعبة لا نوليّ آنا الرّب الأعلى.وعلى ما نشوّه خصمي يمكن نربح في الانتخابات وندزّ فازتي.
يلعن بو السياسة اللي تخلّي اسم ربّي سلعة تتباع وتتشرى واللي تخلّي ترهيب الناس وتخويفهم فو دو كاومارس(fond de commerce) يخدمو بيه البعض. لا يزّي مميزر وفقير ومعقّد وتاعب نفسيا وإلا اجتماعيّا وزيد تخوّفه بنار جهنم كان ما يحطّش الورقة الفلانية في الصندوق.
يلعن بو السياسة اللي تخلّيك تتحالف مع واحد ما تتفاهمش معاه في مبادئه, آما تعرفه يوصّل. يلعن بو السياسة اللي تخلّيك تمشّي حويجة تحت الطاولة وتقول كلام من جنس آخر فوق الطاولة. يلعن بو السياسة اللي تخلي عندي عشرين وجه تحت الرّدّة، نجبد اللي يمشي مع المناسبة.
يلعن بو السياسة...اللي تخلّي صاحب البارح يولّي عدوّ اليوم...اللي تخلّي عدوّ البارح يولّي صاحب اليوم...اللي تخلّيني نسبّ ناس كليت معاهم ماء وملح...ونضحك في وجوه عباد شبعت فيهم سبّان في قفاهم.
يلعن بو السياسة هاذي...
وآنا متأكّدة اللي برش منكم من غير ما يعملوا السياسة المباشرة هاذي ينجّمو يخدمو البلاد...معلّم مطيّش في ريف يقرّي في الصّغيّرات...طبيب يداوي في مرضى زواولة بلاش...ناس تعمل في حملة تبرّعات لا عندها اسم ولا عنوان لكل محتاج...ناس تقول لا لرشوة ومحسوبية...حتى عباد تخمّم قبل ما تبرتاجي على فايسبوك إشاعة تمسّ الأعراض من غير ما تثبّت منها...
ونقعد ديما نقول: يلعن بو السياسة هاذي
4 commentaires:
لست من المعجبين بكل كتاباتك لكن البعض كهذه يعجبني كثيرا , ممتاز المقال يا الفه
أنا مررت بمدونتك بالصدفة البحتة ...و أعجبني جدا هذا المقال ...بالمناسبة أنا من مصر ....و نحن لن ننسى أبدا كيف كان تونس و أهل تونس العظماء النور الهادي لنا في ثورتنا ...و لكن يبدو أن الأوضاع عند الأشقاء ليست بأحسن حال من عندنا ...يبدو أننا كنا ساذجين عندما تصورنا أن أحلامنا من الممكن أن تتحقق
Olfa se rapproche de Jalel brick au niveau linguistique :-)
exactement ce que je ressens souvent !!! bravo
Enregistrer un commentaire