دعاء سنة 2012

يا ربّي بجاه عزتك وجلالك اجعلهم في ها العام يتفكّرو اللي إنت ربّي وإنت اللي تحاسب. خلّيهم يحشموا على ارواحهم كيف يحاسبو النّاس ويلعبو دور الذّات الإلهيّة. يا ربّ بجاه عزّتك وجلالك اجعلهم في ها العام يتفكّرو اللي كلّ واحد حرّ في روحه واللي يربحوا ثواب كيف يسيّبو خَْلق ربّي للّي خْلقهم. يا ربّي بجاه عزّتك وجلالك خفّف علينا غمّة ها الجماعة اللي يتشبّهوا بيك وماشي في بالك هوما أقرب ليك من خلق ربّي الأخرين وكاينهم دخلو في قلوب النّاس وضمائرهم وعرفوا أفعالهم. يا ربّي بجاه عزّتك وجلالك خلّيهم يحلّوا أكثر من ربع صفحة ويقراو شويّة كتب ويشوفوا شويّة أفلام ويسمعو شويّة موسيقى ويشوفوا شويّة لوحات. يا ربّ اجعلهم يتفرهدو في مخاخهم وفي أجسامهم باللي يرضّيك ويرضّيهم. يا ربّ اجعلهم يتواضعو ويتذكّرو اللي حتّى واحد ما يعرف الحقيقة واللي إنت وحدك صاحب العلم...

يا ربّ نعرف اللي انت تستجيب للدّعاء. كان تحقّق هذا عام 2012 نحمدوك وكان ما تحققش نحمدوك زاده على خاطر أنت الذي لا يُحمد على مكروه سواه. وتجينا في الصّبر نربحو بيه ثواب وفي الإبداع نشيخو بيه ونتمتّعو...ونقولو: إنّك لا تهدي من أحببت ولكنّ الله يهدي من يشاء...